ගැහැනුන් ගණිකාවන් වෙන්නේ ඇයි?

අම්බපාලියයැයි ඈ නම් ලද්දීය. ලෝකයේ ඉපැරණිම රැකියාව රන්කහවනු උපයන මාවත බවට පත්කරගත් අම්බපාලියන් උකුසු ඇස් ගෙන, මොනර වෙස්ගෙන අද ද මේ අහසත් පොළවත් අතර සරන්නීය. වැටෙන්නට දී වැටෙන අතකට, නිරුවත වහන් කළ දුහුල් සළුවට, ඈ මොනර කොළ උපයන්නීය: රූසිරි නම් මායාවෙන් වැසුණු දෙතිස් කුණු කය වළඳන්නට දී මහත්වරුන්ට.... නමවත් නොදන්න පිරිමින් සමග යහන්ගත වෙන්නට සැදී පැහැදුණු වෙසඟනයැයි නම් ලද ඈ මාවතක් මාවතක් පාසා වීදිවල මෙන්ම සමාජ ශාලා, සුපිරි ගණිකා නිවාසවල ද හිඳ ඉටුකරන්නේ එකම රාජකාරියකි.

ඒ ලෙයට මසට මිලක් කියමින් පිරිමි සිරුරක ගින්න නිවීමේ රාජකාරියයි. නමුදු ඔවුන්ද ගැහෙන සැලෙන සිතුවිලි උපදින හදවත් ඇති මනුෂ්‍ය කුලකයේම මිනිසුන් නොවේද? පැයට දෙකට ගැහැනු සිරුරු මිල කරන සංස්කෘතියේ නෙතට වහංවුණු කතාන්දරය එන්න කියවන්න අපත් එක්ක.

ගැහැනුන් ගණිකාවන් වෙන්නේ ඇයි? මේ වෙද්දී ශ්‍රී ලංකාවේ පනස් දහසකට ආසන්න සංඛ්‍යාවක් ගණිකා වෘත්තියේ යෙදෙන පසුබිමක් තුළ ගැහැනුන් ගණිකාවන් වෙන්නේ ඇයි යන්න පිළිබඳව සමාජයීය සාධක ඔස්සේ විමසන්නට සිත්වෙයි.

තරුණියන් මෙන්ම විවාහක දරුවන් සිටින කාන්තාවෝද ගණිකා වෘත්තියට පෙළඹෙති. ගැහැනුන් ගණිකා වෘත්තියට පෙළඹෙන්නට එක් හේතුවක් වන්නේ ඔවුන්ට තම අනන්‍යතාව තහවුරු කර දැක්වීම සඳහා උප්පැන්න සහතිකය හෝ ජාතික හැඳුනුම්පත නොමැතිවීම යන කාරණයයි. සමාජය කෙතරම් නවීකරණය වුවද විවිධ හේතු මත උප්පැන්නය හෝ හැඳුනුම්පත නැති පිරිස් අදටත් සිටිති.

තම අනන්‍යතාව තහවුරු කරන්නට අවශ්‍ය මෙකී සාධක තමා සන්තකයේ නොමැති වූ විට රැකියාවකට තබා අඩුම තරමේ මෙහෙකාර වෘත්තියටවත් පිවිසීම දුෂ්කර වන සමාජ වාතාවරණයක් මේ වනවිට නිර්මාණය වී තිබේ. එහෙත් අඩුම තරමේ දෙවේලක් හෝ කමින් ඔවුන්ද ජීවත් විය යුතුය. මිරිවැඬි සඟලක් නොපැළඳුවත් විලි වහගන්නට ඇඳුමක් පැළඳුමක් ගත යුතුය. තමන් රකින්නට, රැකවරණය සලසන්නට, කන්න අඳින්නට දෙන්නට තමන්ට යැයි කියා කවුරුත් නැති පසුබිමකදී සුළු රැකියාවක් හෝ කරන්නට අවශ්‍ය කිසිදු සුදුසුකමක් නැති පසුබිමකදී ජීවත් වෙන්නට පහසුම මග ලෙස සිරුර විකුණමින් ජීවත්වීමේ මාර්ගය තෝරා ගන්නට ඇතැම් කාන්තාවෝ පෙළඹෙති.

එමෙන්ම වැඩි කාලයක් හා ශ‍්‍රමයක් වැය නොකර විශාල වශයෙන් මුදල් ඉපයීමේ මාර්ගයක් බවට ගණිකා වෘත්තිය පත්වීමද කාන්තාවන් තම ජීවන වෘත්තිය ලෙස ගණිකා වෘත්තිය තෝරා ගැනීමට පාදකවී ඇති තවත් හේතුවකි.

විධායක ශ්‍රේණියේ රැකියාවක නිරත වූ කාන්තාවන් මසකට උපයන මුදල හා සමාන මුදලක් එක් දිනක පැය කිහිපයක් ඇතුළත උපයා ගන්නට සුපිරි ගණිකා නිවාසවල සිට ගණිකා වෘත්තියේ යෙදෙන ගණිකාවෝ සමත් වෙති. මූල්‍යමය සාධක මිස තම ලිංගික තෘප්තිය ඔවුන්ගේ අපේක්‍ෂාව නොවේ. එහෙත් නැවත වරක් තමා සොයා පැමිණීමේ සිතුවිල්ල තමා හමුවට එන හැම ගැනුම්කරුවකුගේම සිත්හි ජනිත කරන්නට ගණිකාවන් උත්සාහ කරයි.

හැකි උපරිම ලෙස තම ගැනුම්කරුගේ ලිංගික ආශා සන්තර්පනය කරන්නට ඔවුන් වෙහෙසෙන්නේ එබැවිනි. ඒ තම පැවැත්ම තීරණය කරන සාධකය එය වන බැවිනි.

1977 විවෘත ආර්ථිකයට දොර කවුළු විවර වීමත් සමඟ මිනිසුන්ගේ අවශ්‍යතා වඩා සංකීර්ණ විය. ක‍්‍රමයෙන් සිදුවූ සමාජ පරිවර්තනයත් සමග සාරධර්ම පිරිහී ගිය සමාජයක මුදල් කේන්ද්‍රීය සාධකය බවට පත්විය. මුදල් උපයමින් සැප සම්පත් පසුපස හඹායාමේ නොනිත් ආශාවද ගැහැනුන් ගණිකාවන් බවට පත් කළ තවත් හේතුවකි.

එමෙන්ම ගමෙන් නගරයට සංක‍්‍රමණය වන තරුණියන් ඉහළ සමාජයට ප‍්‍රවේශ වීමේ පාලමක් ලෙසද, තවත් විටෙක ආගන්තුක සෙයිලමේ රැුවටිලිකාර මිනිසුන් හමුවේ රැුවැටී අතරමං වීම නිසාද තම රැකියාව ලෙස ගණිකා වෘත්තිය තෝරා ගත්තාය. පවුල් සංස්ථාව තුළ නිසි මව් පිය රැකවරණයක් හා මග පෙන්වීමක් නොමැති වීමද, තම පෙම්වතා වෙතින් පියා සහෝදරයා හෝ ළඟම ඥාතීන් වෙතින් අතවරයට ලක්වීමද තරුණියන් ගණිකා වෘත්තියට පෙළඹීමට තුඩු දෙන තවත් හේතුන් ය.

තවද දරිද්‍රතාව, සහෝදර සහෝදරියන්ට උගන්වමින් මව්පියන් ජීවත් කරවීමේ යුතුකම ඉටුකිරීම, සැමියා ඔත්පල වීම හෝ ඔහු නොසලකා හැරීම නිසා ඇතිවෙන අර්බුදය, දරුවන්ට ඉගැන්වීමේ අවශ්‍යතාව, පීඩාකාරී පවුල් පසුබිම් මත ජීවත්වන තරුණියන් සෙනෙහස සොයා ගොස් මග වරදා ගැනීම යන හේතු මතද ගණිකා වෘත්තියට පෙළඹුණු කාන්තාවෝ සිටිති.

මූල්‍යමය වාසියක් අපේක්‍ෂාවෙන් ලිංගිකත්වය අලෙවි කරන වෘත්තිය හෙවත් ගණිකා වෘත්තියටම අනන්‍ය වූ සංස්කෘතියක් ද නිර්මාණය වී තිබේ.
කොළඹ හා තදාසන්න ප‍්‍රදේශවල ගණිකා නිවාස බහුල ලෙස පවතී. ඇතැම් ගණිකාවන් පැමිණෙන  ඕනෑම ගැනුම්කරුවකුගේ අවශ්‍යතා සපුරා දෙන්නට ලෑස්ති වී සිටියත් සුපිරි මට්ටමින් පවත්වාගෙන යන ගණිකා නිවාසවල වෙසෙන ගණිකාවන්ගේ පහස ලබා ගත හැක්කේ විශ්වාසදායී එමෙන්ම සුපිරි මට්ටමේ ගැනුම්කරුවන්ට පමණි. එමෙන්ම ඒ සඳහා අයකරන මුදලද ඉහළ අගයක් ගන්නා අතර ගණිකාවන් සැපයීම, මුදල් අය කිරීම ආදී සියලූ කටයුතු සිදුවන්නේ විධිමත් ආකාරයටය.

නීතියේ රැහැනට කොටු නොවෙන ක‍්‍රමවේද ඔස්සේ ආරක්‍ෂිතව එම ගණිකා නිවාස පවත්වාගෙන යන අතර ගණිකා නිවාසයේ පාලනය ගෙනයන තැනැත්තා හෝ තැනැත්තියගේ සැලසුම් අනුව ගණිකාවන් සැපයීම, මුදල් අයකිරීම, අයකරන මුදලින් ප‍්‍රතිශතයක් ගණිකාවට ලබා දීම ආදිය තීරණය වෙයි.
වීදි ගණිකාවන් ලෙස සලකන සාමාන්‍ය මට්ටමේ ගණිකාවන්  ඕනෑම මට්ටමක පුද්ගලයකුට තම පහස ලබාදෙන අතර කොළඹ හතරවැනි හරස්වීදියේ නාටාමිවරුන් දවල් කාලයේ බඩු ප‍්‍රවාහනය සඳහා භාවිත කරන කරත්තය රාති‍්‍රයේදී ඇතැම් වීදි ගණිකාවන්ගේ සයන බවට පත්වෙයි.

දුටු පමණින් මේ ගණිකාවන්ය යන්න හඳුනා ගැනීම සඳහා ගණිකාවන්ටම අනන්‍ය වූ බාහිර සාධකද පවතී. ඇඳුම් අඳින ආකාරය හා විශේෂිත වර්ණ, මුහුණ හා හිසකෙස් හැඩ ගැන්වීමේ ක‍්‍රම විශේෂයෙන්ම තොල් ආලේපන සඳහා භාවිතා කරන වර්ණ, ලේන්සුව, කුඩය තබා ගන්නා ආකාරය අනුව ලබා දෙන සංඥා, පළඳින ඇතැම් ආභරණ විශේෂයෙන්ම පහසුවෙන්ම වීදි ගණිකාවන් හඳුනා ගැනීමට උපකාරීවන සාධක වෙයි.

තම කැමැත්ත අනුවම තම වෘත්තිය ලෙස ගණිකා වෘත්තිය තෝරා ගන්නා කාන්තාවන් ද සිටින්නීය. අසාමාන්‍ය කාමුක ආශා නිසා ඔවුන් එසේ ගණිකා වෘත්තිය තෝරා ගන්නා අතර එසේ ගණිකා වෘත්තිය තෝරා ගත් පිරිස 1%ක් තරම් අඩු ප‍්‍රතිශතයක් ගනී.

ගණිකා වෘත්තියේදී තමා වෙතට පැමිණෙන පුද්ගලයා තම අවශ්‍යතා තමාට රිසි පරිදි ඉටුකර ගැනීම සඳහා කවර ක‍්‍රමයක් අනුගමනය කළද, එය කොතෙක් පීඩාකාරී වුවද එය ඉවසා සිටින්නට ගණිකාවන්ට සිදුවෙයි. ඒ එකී ගනුදෙනුව අන්‍යෝන්‍ය විශ්වාසය ආදරය හා බැඳීම මත සිදුවෙන ගනුදෙනුවක් නොව හුදෙක් මුදල් මත සිදුවන වාණිජමය ගනුදෙනුවක් වන හෙයිනි.

සුපිරි ගණිකා නිවාසවල ලාංකික කාන්තාවන් මෙන්ම විදේශීය කාන්තාවෝද සේවය කරති. විශේෂයෙන්ම චීන, රුසියානු, තායි, පිලිපීන කාන්තාවන් ශ්‍රී ලංකාවේ ගණිකාවන් ලෙස සේවය කරයි. ඒ හැරුණු විට ඉන්දියානු හා බංග්ලාදේශ කාන්තාවන්ද ලංකාවේ සුපිරි ගණිකා නිවාසවල සේවයට එක්වී සිටින්නීය.
සුපිරි මට්ටමේ ගණිකා නිවාසවලට දැඩි ආරක්‍ෂාවන් යොදා ඇත. ගණිකා නිවාසයට පැමිණෙන්නන් දුර තියා හඳුනා ගන්නට, පැමිණෙන්නන් සම්බන්ධයෙන් සැකයක් මතු වුවහොත් නීතියෙන් ගැලවීම සඳහා පලා යන්නට රහස් මාර්ග හා ක‍්‍රම ඔවුන් කල්තියාම සැලසුම් කර ඇත. මේවායෙහි ආරක්‍ෂිත කැමරා පද්ධතියක් සවිකර ඒ පිළිබඳව නිරන්තරයෙන් නිරීක්‍ෂණ කටයුතු සිදුකෙරෙන අතර ගණිකා නිවාසය තුළට ඇතුළු වන්නන්ද එහි සිටින ආරක්‍ෂක නිලධාරීන්ගේ විශේෂ පරීක්‍ෂාවට ලක් කෙරේ.

සුපිරි ගණිකා නිවාසවල සිටින ගණිකාවන් සාමාන්‍යයෙන් වයස අවුරුදු 20 හා 35 අතරෙහි පසු වන්නන් වෙයි.

ව්‍යාපාරිකයන්, දේශපාලනඥයන්, මැති ඇමැතිවරුන්, ක‍්‍රීඩකයන්, විධායක ශ්‍රේණියේ නිලධාරීන්, උසස් පොලිස් නිලධාරීන් හා හමුදා නිලධාරීන් මෙම සුපිරි ගණිකා නිවාසවල නිත්‍ය සාමාජිකයන් බවට පත්ව ඇති වාතාවරණයක් දක්නට ලැබේ.

ඇතැම්විට මේ ගණිකාවන් එක් දිනකට පුද්ගලයන් 15 ක් 20ක් සමග යහන් ගත වෙයි. අද වෙද්දී නගරයෙන් පිටස්තර ග‍්‍රාමීය පෙදෙස්වල ඉදිව ඇති නවාතැන්පොළවලද ගණිකාවන් සැපයීම පුළුල් ලෙස සිදුකරයි. ඒ අලූත්ම ක‍්‍රමවේදයක් ඔස්සේය.

ගම්බද තරුණියෝ හා කතුන් මෙම නවාතැන්පොළවල්වල ගණිකාවෝ ලෙස කටයුතු කරති. නවාතැන්පොල ආදායම් අඩු නිසා ඔවුන්ගේ එක් පරමාර්ථයක් වන්නේ එය ගොඩනැගීමට යෙදවූ ප‍්‍රාග්ධනය නැවත උපයා ගැනීමය. ඒ සඳහා ඔවුහු මෙම ගණිකා ව්‍යාපාර පවත්වති.  තම සේවය ලබාදී තමාට හිමි මුදල ලබා ගැනීමෙන් පසු ඇය නැවත තම සුපුරුදු ජීවිතයට යයි. මෙවැනි ගණිකාවන්ගේ ප‍්‍රවාහනය සැපයීමට එම නවාතැන්පොළ හා සම්බන්ධ ත‍්‍රීවිල් රියදුරන් හා ගණිකාවන් සැපයීමේ බ්‍රෝකර්වරුද සිටින අතර ඔවුන්ට ද එමගින් මුදලක් ලැබේ.

නගරබද රැුකියා කරන ඇතැම් තරුණියෝ තම දිවා ආහාර විවේකය සඳහා ලැබෙන පැයක කාලය ගණිකා වෘත්තිය සඳහා යොදවමින් අමතර ආදායමක් උපයා ගන්නට පුරුදු වී සිටිති. එමෙන්ම උදේට කාර්යාල ප‍්‍රවාහන සේවා වාහනයකින් පැමිණ දවස පුරා ගණිකා නිවාසයක සේවය කර සවසට කාර්යාල නිමාවෙන වේලාවට එම වාහනයේම නිවෙස්වලට යන ගණිකාවෝද සිටිති. තම දියණියගේ, පෙම්වතියගේ, බිරියගේ රැුකියාව මෙය බව ඔවුන්ගේ පවුල්වල උදවිය පවා නොදනිති.

සුපිරි ගණිකා නිවාසවල පැකේජ ක‍්‍රමයටද ගණිකාවන්ගේ සේවය ලබාගත හැකිය. පැයකට රුපියල් හාරදහස, පන්දහස, හය දහස, පහළොස් දහස දක්වා වූ මිල ගණන්වලට මේ පැකේජ ක‍්‍රමය යටතේ ගණිකාවන් විකිණෙයි. සම්පූර්ණ රාති‍්‍රයක් ඇය හා ගත කිරීමට නම් ඒ වෙනුවෙන් විශාල මුදලක් වැය කළ යුතුය.

බොහෝ සුපිරි ගණිකා නිවාසවල විදේශීය ගණිකාවන් සඳහා පැයකට අයකරන මුදල රුපියල් හත් දහසේ සිට දහසය දහස දක්වා මුදලක් වෙයි.
එමෙන්ම නිත්‍ය ගනුදෙනුකරුවන් බවට පත්ව ඇති ගනුදෙනුකරුවන් වෙනුවෙන් ඇතැම් සුපිරි ගණිකා නිවාසවල විශේෂ පැකේජ ක‍්‍රමද ක‍්‍රියාත්මක වෙයි. මේ ඇතැම් පැකේජ රුපියල් ලක්‍ෂ පහේ සිට ලක්‍ෂ පහළොව දක්වා වූ පැකේජය.

එමෙන්ම වෙළඳපොළේ මිල අධික රෙඞ් ලේබල්, ෂිවාස් රීගල්, බකාඩි, ටිකිලා, වොඞ්කා, බ්ලැක් ලේබල් ආදී මත්පැන් වර්ගද මෙම සුපිරි ගණිකා නිවාසවලදී ගනුදෙනුකරුවන්ට මිලදීගත හැකි අතර ඇතැම්විට මේවා තීරුබදු පවා නොගෙවමින් හොරෙන් ගෙන්වූ ඒවාය.
පැකේජ ක‍්‍රමයට ගණිකා සේවය ලබා ගනිද්දී ගනුදෙනුකරුවන් කිහිප දෙනකුට එක් ගණිකාවක් ලබාගත හැකිය. අවශ්‍ය සියලූ පහසුකම්ද ලබාගන්නා පැකේජය අනුව සැපයේ.